Web edukia bistaratu Web edukia bistaratu

Aktualitatea

Eduki publikatzailea Eduki publikatzailea

Atzealdea

Ingurumeneko Departamentuak liburu bat aurkeztu berri du: Gipuzkoa Naturaldia: 25 gai pil-pilean, Tolosa Naturaldiaren 25 urteko atzera begirakoa egiten duen argitalpena

Jose Ignacio Asensio: “Liburu honek ingurumenaren arloan pil-pilean dauden 25 gai mahaigaineratzen ditu. Gai horiei guztiei konponbide bat ematea ezinbestekoa da planeta honen behar ekologikoekin bat egiten duen garapen eredu baten bidean aurrera egiteko”. Argitalpenak 25 adituk idatzitako artikuluak biltzen ditu. Naturalistek, ingurumen arloko adituek, zientzialariek, filosofoek, kazetariek eta artistek osatzen dute 25 kideko taldea. Askotarikoak dira, baina bizitzarekiko eta ingurunearekiko errespetuak elkartzen ditu. Liburua Tolosako Topicen aurkeztuko da datorren ostiralean, urriak 20, 19:00etan. Aurkezpen ekitaldian izango dira egile horietako batzuk, hala nola Sebastián Álvaro, Odile Rodríguez de la Fuente, Pedro Cáceres, Joaquín Araújo, Teresa del Valle, Asier Hilario eta Iñaki Aizpuru.

2017·10·20


Ingurumeneko Departamentuak liburu bat aurkeztu berri du: Gipuzkoa Naturaldia: 25 gai pil-pilean, Tolosa Naturaldiaren 25 urteko atzera begirakoa egiten duen argitalpena

Ingurumeneko diputatu Jose Ignacio Asensiok Gipuzkoa Naturaldia: 25 gai pil-pilean liburua aurkeztu du. Argitalpenak bi bloke nagusi ditu: lehena, adituek idatzitako ingurumenari buruzko 25 artikuluk osatzen dute; bigarren atalak, berriz, mugarriak, anekdotak eta argazki galeria bat biltzen ditu, Tolosa Naturaldia omentzeko eta oroitzeko asmoz. Asensiok azpimarratu duenez, liburuak ingurumenaren arloan pil-pilean dauden 25 gai mahaigaineratzen ditu: “Gai horiei guztiei konponbide bat ematea ezinbestekoa da planeta honen behar ekologikoekin bat egiten duen garapen eredu baten bidean aurrera egiteko”, adierazi du.

Liburua bihar 19:00etan aurkeztuko da jendaurrean, Tolosako Topicen. Aurkezpen ekitaldian izango dira egile horietako batzuk, hala nola Sebastián Álvaro, Odile Rodríguez de la Fuente, Pedro Cáceres, Joaquín Araújo, Teresa del Valle, Asier Hilario eta Iñaki Aizpuru. Halaber, larunbatean, hilak 21, 12:00etan, beste aurkezpen bat egingo da Donostiako Fnacen, eta ekitaldia amaitutakoan ale bat oparituko zaie bertaratu diren guztiei. Gainera, nahi duenak liburua sinatzeko eskatu ahal izango die egileei.

Argitalpen honek Tolosa Naturaldiaren ondarea biltzen du gaur egun pil-pilean dauden 25 gairen bidez, eta argi uzten du natura osatzen duten gaiak gaurkotasunez beteak direla. Artikuluen egileak 25 aditu dira: naturalistak, ingurumen arloko adituak, zientzialariak, filosofoak, kazetariak eta artistak. Askotarikoak izan arren, bizitzarekiko eta ingurunearekiko errespetuak elkartzen duen aditu talde bat da honako hauek osatzen dutena: Iñaki Aizpuru, Sebastián Álvaro, Joaquín Araújo, Pedro Arrojo, Joseba Azkarraga, Luis Balairón, Pedro Cáceres, Mabel Cañada, Carlos de Hita, Teresa del Valle, Miguel Delibes, Arturo Elosegi, Javier García Breva, Nisa Goiburu, Jane Goodall, Asier Hilario, José Antonio Marina, Emilio Miguel Mitre, Daniel Pauly, Odile Rodríguez de la Fuente, Salvador Rueda, Margarita Salas, Jordi Sargatal, Manuel Toharia eta Adolfo Uriarte.

Asensiok azaldu duenez, Tolosa Naturaldia garapen jasangarria lortzeko egin beharreko aldaketez “hausnartzeko leku” izan da 25 urtez, eta gogorarazi du Ingurumeneko Departamentuak helburu estrategikotzat duela jasangarritasunerako heziketa. “Garapen jasangarriaren eredu berrirantz trantsizio sozioekologiko bat egin nahi badugu, guk geuk aldatu behar dugu; horretarako, beste norabide batean jarriko gaituzten balioetan hezi beharra dugu, baliabideen kontsumitzaile eta planeta hau osatzen duten beste espezieen bizilagun garen heinean”, adierazi du foru diputatuak.

Horrez gain, liburuak epilogo bat eta 25 kontakizun edo fabula ditu. Ezaugarri horiek balio erantsia ematen diote argitalpenari; izan ere, eduki guztiak (hizkera dibulgatzaile baina teknikoan emanak) hizkuntza liriko batekin lotzen dituzte, eta emozioei dei egiten. Kontakizunak Itziar Eizagirre ingurumen abokatu eta idazlearenak dira. Izatez, beste liburu bat da, sentiarazi eta pentsarazi nahi duten indarrez beteriko kontakizunak biltzen dituena. Kontakizun horietan irudimenaren eta fikzioaren hizkuntza unibertsala baliatzen da, hizkuntza bat, zeina lurraren jakitate oparoetan integratzen eta funtsatzen baita, bizitzarekiko loturan, horren forma anitzetan eta askotarikoetan. Artikulu bakoitzaren aurretik dator egile bakoitzarentzat bereziki sortutako kontakizuna.

Bestalde, liburuaren bertsio elektroniko bat ere sortu da (ePub formatuan), eta eskuragarri egongo da Ingurumen Zuzendaritzaren web orrian (www.gipuzkoaingurumena.eus).